Forteljekunstakademiet i Fjaler: Du kan!
Vil du utvikle dine evner til å fortelje munnleg og skriftleg? Med sats i arven etter hjartedannaren Nikka Vonen, inviterer vi til Forteljekunstakademiet «Du kan!».
Du kan!
800 jenter. Så mange elevar var innom det vidgjetne Nikka Vonens Pigeinstitutt i Fjaler. Bjørnstjerne Bjørnson sende barn og barnebarn hit, og den første kvinna på Stortinget, Karen Platou, gjekk i skule hos Nikka.
I i ei tid då få jenter fekk utdanning, via Nikka seg til å skikke elevane sine til livet. Ho må ha lukkast, for vitnemåla om Nikka er mange og gode.
Livsverket hennar var hjartedanning, sa soknepresten Døskeland. I eit minneord skreiv han: «Hennar undervisning og oppdraging av elevane var i beste forstand øving i livskunst». Ei av jentene sa: «Samværet med Nikka ga oss alltid mot og håp. Det var som om hun sa, med eller uten ord: Du kan!».
Under årets tema kvinna, tek Sandesenteret sats i arven etter Nikka.
Velkomen til Forteljekunstakademiet «Du kan!», der du blir kjend med Nikkas idear om danning og utviklar dine evner til skriftleg og munnleg forteljing.
Framlegg til program
DAG 1: TORSDAG 13. AUGUST
10-12 Verselesingskurs på Steia gard
Nikka var inspirert av N.F.S. Grundtvig og folkehøgskulerørsla, som la vekt på det levande ordet og danning. I undervisninga vektla ho samtale, refleksjon og munnleg formidling. På dette kurset arbeider vi med det levande ordet. Vi går til hjarta av Jakob Sande sine dikt og finn fridomen i bunden form. Kurset gir innsikt i diktaren sin prosess og øving i munnleg framføring.
Kursleiar Liv Hege Skagestad er rådgjevar i Sandesenteret og kunstnarleg leiar og instruktør ved Den mangfaldige scenen. Ho vaks opp på Romerike Folkehøgskole og har lang erfaring innan teater.
12 Nikka Vonens matbord i Løa
Med mat frå Strandakokken.
1300 - 1500 Undervisningskunst på Steia gard
Velkomen til ein verkstad med samtalar og praktiske øvingar innan pedagogikk og formidling. Økta blir leia av universitetslektor ved UiS Sigrid Sandemose.
Kva kjenneteiknar undervisning og læringssituasjonar ein hugsar lenge etterpå? Går det an å lære noko utan å ha blitt utfordra og forandra? Kva skal til for at læringsstoffet rører ved elevane? Og korleis kan ein legge til rette for at dei held seg aktive gjennom læringsprosessar?
Vi samlast på Steia gard, i huset der Nikka Vonen i si tid underviste og styrte skulen. Nikka Vonen var ein markant pedagog og skulegrunnleggjar som sette elevane si aktive deltaking, praktisk læring, danning og dialog i sentrum. Den pedagogiske arven hennar kan framleis gi inspirasjon til undervisninga i dag. Med utgangspunkt i overordna del av LK20 blir det samtalar, undring og kanskje ei vandring, medan vi utforskar kva undervisningskunst kan vere, og kva rolle dialog, relasjonar, kropp og rørsle kan spele for læring og danning.
1630 Middag i Løa
1800 - 1900 Nikka Vonens hemmelege hage på Steia gard
Nikka hadde eit stort engasjement for planter, hagestell og nyttevekstar. Jentene gjekk på fjellturar, hadde fiskerett i elva, drog på utferder og observerte planter, dyr og landskap. Hagen var vakkert opparbeidd med frodige blomebed, bærbusker, pryd- og frukttre, og mange fine små hus.
No gror nye spirer på Steia gard. Saman med Nikka Vonens venelag inviterer vi til ein time med oppdagingsferd og forteljebål i Nikka Vonens hemmelege hage. Oppdagingsferda blir leia av Alexander Rauboti frå Musea i Sogn og Fjordane, og med seg har han b.a. andre historikar, høgskulelektor og Nikka Vonen-biograf Greta Hekneby og forteljarbål-skapar Tove Elise Ihler frå Oppigard i Possåsen, Finnskogen.
1800 - 2000 Lukka kurs med E.V. Crowe: Perfekt norsk? Dårleg norsk? Kva om KVA du vil seie er viktigare enn KORLEIS du seier det? i Gamle skulehuset
Kurs for deg som har norsk som andrespråk. Les meir og meld deg på her.
2000 Konsertframsyninga Formødre i Løa
Pianist og musikkformidlar Sara Aimée Smiseth kombinerer virtuost klaverspel med levande historieforteljing. Ho tek publikum med gjennom 350 år familiehistorie, sett gjennom liva til ni generasjonar kvinner – akkompagnert av ikoniske verk frå klaverhistoria.
Billett må tingast utanom. Ting billett her.
DAG 2: FREDAG 14. AUGUST
0800 - 0900: Frukostmøte med Nytta i Studio Nova
0930 - 1030 Kurs i høgtlesing og formidling med Rolf Magne Golten Andersen i Studio Nova
Rolf Magne Golten Andersen er forfattar, manusforfattar, dramatikar og forteljar. Han er kjend for Kokosbananas og for engasjerande formidling og høgtlesing.
10-12 Lukka kurs med Sarah Camille Osmundsen: Språk og poesi på Steia gard
Kurs for deg som har norsk som andrespråk. Les meir og meld deg på her.
1100 - 1300 Kurs i munnleg forteljekunst med Heidi Dahlsveen i Studio Nova
Dette praktiske kurset tek deltakarane steg for steg inn i munnleg forteljing. Det startar med kva munnleg forteljekunst er, før det utforskar ulike typar forteljingar – frå eventyr til personlege historier. Gjennom praktiske øvingar får deltakarane verkty og innsikt i korleis den munnlege forteljinga lev i eit møte mellom forteljar og lyttar. Deltakarane kan arbeide med tradisjonsstoff henta frå innsamlinga til Nikka Vonen, og forme det til sin eigen levande versjon.
Kursleiar Heidi Dahlsveen er forfattar, forteljar og dosent i munnleg forteljekunst ved OsloMet.
13 Nikka vonens matbord i Løa med oppsummering og avslutning
Etter akademiet startar Fest i Fjaler.
Påmelding
For å delta kjøper du billett i Ticketco. Du kan kjøpe billett for ein eller begge dagar. Billetten inkluderer program og lunsj. Utanom er det tilbod om middag.
Studentar deltek gratis, og kan melde seg på til tora@jakobsande.no. Du må sjølv dekkje reise og overnatting. Skriv om du treng hjelp til å finne overnattingsplass.
Du som har norsk som andrespråk, kan òg du melde deg på Skriveverkstad for deg med norsk andrespråk. Skriveverkstaden går parallelt med anna program. Deltaking, reise, kost og losji er gratis for deg som får plass på dette kurset.
Om Forteljekunstakademiet
Sidan 2023 har Jakob Sande - senter for forteljekunst haldt sommarakademi i Klokkargarden og Steia gard i Fjaler.
I Klokkargarden vaks diktar og forteljar Jakob Sande opp, og tunet er i dag hovudsete for eit nasjonalt senter i skriftleg og munnleg forteljekunst. På Steia gard dreiv Nikka Vonen skule for jenter frå 1871-1907. Desse to kulturmiljøa er av nasjonal betydning og har lang historie som stader for utvikling og fellesskap.
Forteljekunstakademiet er for alle som ynskjer å utvikle evnene sine til å lytte, til dialog, til å fortelje, til å skrive, samhandle og skape.
Kva skjer hos oss?
Undervisningskunst på Steia gard
Velkomen til ein bolk med faglege innlegg og praktiske øvingar om pedagogikk og formidling. Økta blir leia av universitetslektor ved UiS Sigrid Sandemose.
Skrivekurs for deg som har norsk som andrespråk
Vil du møte andre som skriv og utvikle di stemme på norsk? Har du forteljingar eller erfaringar å dele, men treng råd og inspirasjon for å finne ei litterær stemme i det norske språket? Eller har du tekstar på morsmålet ditt som du ynskjer å få omsett til norsk?
Nikka Vonens hemmelege hage på Steia gard
Bli med på oppdagingsferd og forteljebål i Nikka Vonens hage på Steia Gard.