Fest i Fjaler

Ei feiring av forteljekunsten!

Gjennom mange år har Jakob Sande - selskapet arrangert "Fest i Fjaler". I 2025 markerer vi også at det er fem år sidan Jakob Sande - senter for forteljekunst opna. Sidan opninga i 2020 har Sandesenteret bygd opp ei vesentleg verksemd og fått stor merksemd og blitt eit vitalt senter for forteljekunst. 8. - 10. august markerer vi jubileet med eit variert program innan forteljekunst. Det vert samtalar, konsertar, utdeling av samlagsprisen, vandringar og urframføringar. 

På programmet finn du mellom anna:

Fredag 08.08:

• Lansering av Sandesenteret sitt eige tidsskrift, Tidsskriftet Jaja, si første fysiske utgåve.
• Utdeling av Samlagsprisen til Halvor Folgerø, ved Ingvild Bræin og Arve Helle.
• Nynorsk slagersongkviss ved Arild T. Olsen
• Folkemusikkpub med Havbrusen Folkemusikklag

Laurdag 09.08:

• Samtale mellom Kjartan Hatløy og Sivert N. Nesbø. Eline Sundal speler til Kjartan Hatløy sine lesingar.
• Lesing for born i tunet.
• Internasjonal Fabeldag med LPC Heggnes ute i tunet.
• Samtale mellom Katrine Sele og Theresa Grøtan
• Nye vegar i Sande si dikting med Ove Eide og Ingvild Bræin utanfor skulehuset
• Eit møte med Ingvar Nistad og Sverre Kvamme. I samarbeid med Rom for ord.
• Augustikveld i Klokkargarden med program med mellom andre Halvor Folgerø, Siri Sande, Kjersti Wøien Håland, Lubna Jaffery, Kjetil Stavenes, politikarar, Baksaas & Høyer, Mute mode. Kveldens konferansier Irene Kinunda Afriyie. 

Sundag 10.08:
Avslutning av sommarsesongen med håp for hausten. 

• Kåseri ved Halvor Folgerø. Gunnstein Akselberg introduserer.
• Forteljing ved Vivian Midttveit.
• Konsert med Line Dybedal med band i Dale kyrkje.

Billettar i Ticketco. 

Då Gud heldt fest i Fjaler  (skrive 10.august 1954)

 

Eg skal ikkje gløyme kvelden, augustikvelden, du veit,

eg lå utmed stranda og pilka den stunda då fisken beit.

I vest stod ei diger kveldsol og lutte mot himmelrand,

men det var ei jordisk kveldsol som skein på ei jordisk strand.

 

Då var det som alt vart omskapt, eg merka det litt i senn.

Eg var som Johannes på Patmos, Patmos i bibelen.

Former og fargar skifte på strender og firmament,

det som var kjent, vart ukjent, og det som var ukjent, kjent.

 

Eg såg meg ikring forbina, og vende meg fyrst mot aust,

der tempel imot meg lyste istadenfor gamle naust.

Og høgt over spir og kuplar slo regnbogen opp sin krans

mot veldige, ville snøfjell, lauga i måneglans.

 

Då såg eg kometen komme, han kom som ein storm frå sør,

og drog over himmelkvelven sitt blodraue ris av glør.

Velsigna og høgt forbanna han sigla sin kurs mor nord,

til berre ein gyllen avglans låg att over fjell og ford.

 

Fargen i sjøen skifte frå blodraud til silkeblå,

og småfisk kring ripa leika med gylte kruner på.

- Botten på femti famnar låg som eit eventyr

med skimt gjenom myrk koralskog av storfisk og fabeldyr.

 

Fjøra med fuglelivet og skogen i lia der

låg omskapt for augo mine, og kom meg med eitt so nær.

I staden for tjeld og hegre steig ibis og pelilkan,

og palmer og seder susa der før det stod bjørk og gran.

 

Då var det eg høyrde songen frå slippen på Salbu strand,

og ut gjenom stengde portar kom syndarar hand i hand.

Med hammar og tong dei helsa eitkvart som dei såg i sky,

- eg trur at dei såg mot Staden, Jerusalem, Herrens by.

 

Eg skal ikkje gløyme kvelden, det var ein augustikveld,

Vårherre heldt fest for folket i Fjaler prestegjeld,

- Bergens Stift, som det heitte, - Ytre Sunnfjord prosti.

Gud unne oss alle nåden når timen vår er forbi.

 

                     Jakob Sande

frå samlinga Sirius, 1955.