Søk sommarjobb som tunvert og formidlar
Vil du ha ein kreativ sommarjobb i eit unikt kulturmiljø? Vi ser etter deg mellom 17-26 år som vil prøve deg som vert og formidlar, ynskjer å bli betre kjend med diktaren Jakob Sande, og som kan løyse praktiske oppgåver. Søk sommarjobb hos oss i Jakob Sande - senter for forteljekunst!
Sandesenteret ligg i barndomsheimen til forfattar og forteljar Jakob Sande, i Klokkargarden i Fjaler. Vi har eit rikt kulturtilbod i sommarmånadane, og søker etter sommarvertar.
Senteret held ope kvar dag, unnateke måndagar, og leitar no etter ungdom, studentar eller unge vaksne som kan drifte mange av oppgåvene i senteret i sommarsesongen.
Sandesenteret vil tilsette unge over 17 år i sommarjobb i perioden 18. juni - 16 august 2026. Søkarar som har høve til å arbeide under akademi og Fest i Fjaler (12.-16. august) vert prioritert.
Du vil få opplæring i munnlege forteljeteknikkar og opplæring i formidlingsløyper om Jakob Sande og Nikka Vonen og kulturhistorie i Fjaler.
I søknaden skriv du kort om deg sjølv og dine interesser, samt kva for veker du kan arbeide i sommar. Søknad sendast via skjemaet under. Søknadsfrist 5.mai!
Om du vil ha meir informasjon om stillingane kan du ringe 9765 09 66 eller sende ein e-post til rakel@jakobsande.no.
Søk sommarjobb
Aktuelt fra Jakob Sande-senteret
Til lukke med arbeidarane sin internasjonale kampdag
1. mai er arbeidarane sin kampdag, der krav om rettferd og betre arbeidsvilkår blir løfta fram. I diktet "Til den norske landarbeider" oppmodar Jakob Sande arbeidaren til å reise seg, knyte nevane og slutte seg til kampen, og gå saman under ei felles fane.
Les elevane sin rapport frå Bygningsverndagen 2026
Alle sjuandeklassingar i Fjaler og Hyllestad var invitert til Steia gard til Bygningsverndag 21. april. Der deltok elevane i tradisjonshandverk som sløyd, smie, steinarbeid, lafting og gartnararbeid i det rike kulturhistoriske miljøet. Jakob Sande - senter for forteljekunst, Nikka Vonen venelag, Skogselskapet og Kvernsteinsparken stod bak arrangementet. Skrivegruppa fekk prøve seg som både diktarar og journalistar. Med forteljingane om jentene som gjekk på Nikka Vonens pigeskole ferskt i minne, dikta dei fram brev og dagboknotatar frå ein morgon på Steia gard. Dei skreiv også frå ting som var tause forteljarar og fann på historier. Deretter prøvde dei seg som journalistar, og måtte sjå, høyre og spørje for å finne fram til fakta. Her kan du lese journalistane sin rapport frå dagen:
Vekas dikt: KLEPPE-MARET
Årets tema i Sandesenteret er "kvinna". Som del av arbeidet med temaet set vi mellom anna søkelys på kvinnene i Sande si dikting. Kvar veke deler vi eit dikt som passar til temaet. Denne vekas dikt er Kleppe-Maret.