«The World as We Know It» - reisebrev frå eit USA i endring
Frå sin norske heimstad i over 20 år, følger den amerikanske fotografen David Zadig nyhendene frå det Trump-styrte heimlandet med uro. Våren 2025 reiser han til Boston for å vitje sin aldrande far, og lagar eit fotografisk reisebrev for Tidsskriftet Jaja. Under Forteljekunstakademiet fortel og syner han bilete frå reisa til eit USA i endring.
Kva kjenneteikner verda slik du kjenner ho? Kva vil du endre, og kva vil du ikkje miste?
Klima- og miljøendringane, teknologi-gigantane sitt klamme grep om merksemd og informasjonsstraumar, invasjonen av Ukraina, ytre høgre på frammarsj i Europa, dei massive åtaka på menneskerettane i Gaza, Sudan og Kongo, og dei mange menneska drivne på flukt.
Dette er berre nokre av hendingane som krev at vi spør oss kva som står på spel for verda slik vi kjenner ho, og i ei ny digital utgåve skal Tidsskriftet Jaja utforske dette spørsmålet.
Blant bidragsytarane er den Fjaler-baserte fotografen David Zadig, som kjem frå USA. Frå sin norske heimstad i 24 år, følger David dei opprivande endringane i Trump-styrte USA med frustrasjon og uro. Våren 2025 reiser han til fødebyen Boston for å vitje sin aldrande far. I eit fotografisk reisebrev dokumenterer han møta med vener og familie som mobiliserer i redsle, men og med humor, håp og amerikansk oppfinnsomhet.
18. juni kl. 16 kan du sjå bilete og høyre David fortelje frå reisa.
I Løa oppe, Jakob Sande - senter for forteljekunst.
Stunda blir på engelsk.
Photo by David Zadig: Mobilisation of protest is beginning, as seen here on March 15 in Boston. This version of the Statue of Liberty clearly conveys her message.
Inngang: Kr. 100,-
Kva skjer hos oss?
Arbeidsvisning med Marius Kolbenstvedt
Fredag 18. juli viser Marius Kolbenstvedt utdrag frå Mistekunst – ein scenisk monolog basert på møte med palestinsk poesi og personlege tapserfaringar. I Mistekunst vever han saman eigne livskriser med stemmer frå palestinske dikt – ei poetisk og politisk forteljing om avhumanisering, håp og kunsten å sleppe taket.
Ammer frå Sunnfjord // Kristine Ness fortel
På 1700- og 1800-talet reiste fleire kvinner frå Sunnfjord til Bergen for å tene som ammer for velståande familiar. Kva fekk gifte koner til å forlate eigne barn, og korleis reagerte samfunnet? Dette har Kristine Ness ved Sunnfjord Museum forska på, med utgangspunkt i livet til husmannskona Marte Movik. Onsdag 30. juli kl. 18 held ho føredrag om temaet i Løa i Sandesenteret, der det òg vert høve til samtale etterpå.
Fest i Fjaler
Ei feiring av forteljekunsten! Gjennom mange år har Jakob Sande - selskapet arrangert "Fest i Fjaler". I 2025 markerer vi også at det er fem år sidan Jakob Sande - senter for forteljekunst opna. Sidan opninga i 2020 har Sandesenteret bygd opp ei vesentleg verksemd og fått stor merksemd og blitt eit vitalt senter for forteljekunst. 8. - 10. august markerer vi jubileet med eit variert program innan forteljekunst.