Arbeidsvisning med Marius Kolbenstvedt

Marius Kolbenstvedt er dramatikar, regissør, skodespelar, dramaturg, musikar og produsent. Han er utdanna ved Nordisk Teaterskole i Aarhus, har bachelor i kunst-, idé- og kulturhistorie frå Universitetet i Oslo. Kolbenstvedt var med på å stifte teaterkompaniet De Utvalgte i 1994, der han arbeidde i fleire roller fram til 2004. Marius har ved fleire høve hatt ulike roller under Teaterfestivalen i Fjaler. I sommar er han tilbake i Fjaler og i residens i Jakob Sande - senter for forteljekunst, der han arbeider med prosjektet Mistekunst, som han 18. juli inviterer til ei arbeidsvisning av. 

Mistekunst er ein monolog der Marius går i dialog med omsette palestinske dikt og reflekterer rundt avhumanisering, tapserfaring og håp, korleis kunsten kan gjere motstand og forløyse. Gjennom eit personleg utgangspunkt, eit psykisk samanbrot utløyst av livskriser, flyttar monologen seg frå det indre rommet og ut i verdas store sår. Forestillinga spinn ei forteljing der eigne tap og traumar speglar seg i dei brutale livsvilkåra til palestinske kunstnarar og deira poesi. Marius går i dialog med dikt av mellom andre Mahmoud Darwish, Taha Mohammad Ali og Mosab Abu Toha – og stiller spørsmål ved kva slags kunst og ytringar vi toler i vår eigen del av verda. Vi følger Marius når han reiser til Israel og Palestina, vi følger han fram og tilbake i tid og rom når han prøver å komme til bunns i eigne erfaringar med vold, sinne og tap - og å lære kunsten å miste. Lære å sleppe taket.

Konsulentar for ulike fasar av tekstutviklinga til monologen er Mette Karlsvik, Priya Bains og Rebekka Nilsson. 

Det vert open bar og høve for samtale med Marius etter visninga. 

Prosjektet er støtta av: Norsk Kulturråd, Norske Dramatikeres Forbund, Stiftelsen Fritt ord og Nesodden Kommune