Opning av Lygarbenken i Klokkargarden
Bli med på opning og innviing av den nye benken, Lygarbenken, i Klokkargarden. Opninga vert markert med snorklypping og fargerike forteljingar.
Under Sandeseminaret opnar vi den nye Lygarbenken som går rundt tuntreet i Klokkargarden, laga av Sjur Haugen. Benken er tenkt som ein samlingsstad i tunet, ein stad der folk kan slå seg ned, ta ein prat og dele kvardagsforteljingar.
Ideen bak Lygarbenken hentar inspirasjon frå gamle forteljetradisjonar, der gode historier gjekk frå munn til munn, og der det gjerne var rom for å smøre litt ekstra på. På ein lygarbenk er det lov å overdrive litt for å halde praten i gang.
Opninga blir markert med ord frå ordførar i Fjaler, Leif Jarle Espedal og forteljingar frå ulike sider av benken. Det vert forteljing ved Bjørn Enes, frilansjournalist og samlar av munnleg historie i Memoar, Kira van Hoegee, direktør ved Nordisk Kunstnarsenter Dale, og forteljar Neha Verma.
Arrangementet er gratis og ope for alle.
Kva skjer hos oss?
Teiknekurs med Charlotte Rintler
Utandørs teiknekurs med kunstnar og illustratør Charlotte Rintler ved historiske Nikka Vonens pikeskole på Steia Gard. Gjennom teikning med blyant og blekk utforskar kurset dei gamle trehusa, detaljane og stemningane på staden, med fokus på observasjon, komposisjon og kreative teknikkar. Kurset passar for både barn og vaksne.
Omvising i Jakob Sande og Nikka Vonens fotspor
Bli betre kjend med diktar og forteljar Jakob Sande og skulestyrar og folkeminnesamlar Nikka Vonen.
Film frå Fjaler. Filmframsyning i skulehuset
Bli med på ei reise tilbake i tid når sommarvertane inviterer til filmframsyning i skulehuset. "Film frå Fjaler" inneheld unike smalfilmar frå 1930- og 1950-talet, med glimt frå kvardagsliv, festdagar og samfunnsliv i bygda. Opptaka, gjort av distriktslækjarane Harald J. Blaauw og Asbjørn Østby, er i dag ein verdifull del av kulturarven i Fjaler.