Færøysk poesi i omsetjing
Jógvan Helge Gardar er i residens i Sandesenteret. På laurdag møter du Gardar i skulehuset der han les dikt han har omsett frå færøysk til nynorsk og serverer bingokaker!
Jógvan Helge Gardar er frå Oslo, er utdanna jurist og språkvitar, og har gått årskurset på Skrivekunstakademiet i Bergen. Gardar jobbar som redaktør i Norsk Tidend, medlemsavisa til Noregs Mållag.
Medan Gardar er i residens jobbar han med eit eige romanmanus og lagar ei nynorsk omsetjing av BÓK, den nyaste diktsamlinga til den færøyske poeten Lív Maria Róadóttir Jæger. I tillegg jobbar han med eit essay om den nynorske omsetjingshistoria. Det skal stå i neste utgåve av tidsskriftet Mellom, som skal ha omsetjingsaktivisme som tema og kjem i juni.
På hendinga laurdag vil Gardar mellom anna lese dikt frå dei to færøyske poetane Lív Maria Róadóttir Jæger og Vónbjørt Vang:
Lív Maria Róadóttir Jæger er ein færøysk poet fødd i 1981. Ho skriv eksperimentell og konseptuell poesi, og var nominert til Nordisk råds litteraturpris for den førre diktsamlinga si, Eg skrivi á vátt pappír, i 2021. Bøkene hennar er omsette til både dansk, fransk og engelsk, men førebels ikkje norsk. Den nyaste utgjevinga hennar er BÓK, som kom i november 2025.
Vónbjørt Vang er ein færøysk poet fødd i 1974. For si tredje diktsamling, Svørt orkidé, vann ho i haust Nordisk råds litteraturpris for 2025. Samlinga er sett saman av røyndomsnære dikt, kollasjar og dagboknotat, og følgjer kvardagen til ei mor med ein son som slit med å få fotfeste i livet.
Gardar les og fortel, og serverer bingokaker!
Velkomen til laurdagssalong i skulehuset.
Gratis inngong!
Kva skjer hos oss?
Teiknekurs med Charlotte Rintler
Utandørs teiknekurs med kunstnar og illustratør Charlotte Rintler ved historiske Nikka Vonens pikeskole på Steia Gard. Gjennom teikning med blyant og blekk utforskar kurset dei gamle trehusa, detaljane og stemningane på staden, med fokus på observasjon, komposisjon og kreative teknikkar. Kurset passar for både barn og vaksne.
Omvising i Jakob Sande og Nikka Vonens fotspor
Bli betre kjend med diktar og forteljar Jakob Sande og skulestyrar og folkeminnesamlar Nikka Vonen.
Film frå Fjaler. Filmframsyning i skulehuset
Bli med på ei reise tilbake i tid når sommarvertane inviterer til filmframsyning i skulehuset. "Film frå Fjaler" inneheld unike smalfilmar frå 1930- og 1950-talet, med glimt frå kvardagsliv, festdagar og samfunnsliv i bygda. Opptaka, gjort av distriktslækjarane Harald J. Blaauw og Asbjørn Østby, er i dag ein verdifull del av kulturarven i Fjaler.