Bokstaveleg bokbad med Siri Bjorstad Hjermann
Eit friskt fjordbad og ein time med høgtlesing har vist seg å vere ei populær oppskrift. 31. juli inviterer Siri Bjorstad Hjermann til Bokstaveleg Bokbad i Fjaler.
Kva skjer når ein kombinerer eit friskt sjøbad med høgtlesing av god litteratur? Det er idéen bak Bokstaveleg Bokbad, der deltakarane først badar i fjorden, før dei samlast til ei stund med høgtlesing i ei avslappa og uhøgtideleg ramme.
Bak konseptet står Siri Bjorstad Hjermann, filolog ved Florø vidaregåande skule og initiativtakar til Instagram-kontoen Litt.ilag. Gjennom ulike litterære møteplassar ønskjer ho å samle folk rundt gode leseopplevingar.
Bokstaveleg Bokbad starta spontant og leikent, og kan i november feire tre år. Arrangementet har blitt så populært at det ofte er venteliste. Deltakarane omtalar opplevinga som "yoga for hjernen" og som "å træ perler på kvardagskjedet", eit pusterom med nærvær, fellesskap og nye perspektiv.
Siri Bjorstad Hjermann er leseleiar i Shared Reading-metoden, ein internasjonal lesemetode utvikla i Liverpool på 1990-talet av Jane Davis. Metoden byggjer på at litteratur blir delt gjennom høgtlesing og felles refleksjon, utan krav om førebuing eller prestasjon.
Hjermann har tidlegare vore på residensopphald ved Sandesenteret, og kjem no tilbake til Fjaler for å invitere til Bokstaveleg Bokbad.
Velkomen til ein annleis litteraturkveld med fjordbad, høgtlesing og godt lag ein fredag i juli.
Vi møtest kl. 19.00 i Badevika i Dale for eit fjordbad, før vi går til skulehuset i Sande-tunet for høgtlesing og noko varmt å drikke.
Ta med badeklede og ein varm gensar!
Medlem i Jakob Sande-selskapet: 150,-
Ikkje medlem: 200,-
Kva skjer hos oss?
Teiknekurs med Charlotte Rintler
Utandørs teiknekurs med kunstnar og illustratør Charlotte Rintler ved historiske Nikka Vonens pikeskole på Steia Gard. Gjennom teikning med blyant og blekk utforskar kurset dei gamle trehusa, detaljane og stemningane på staden, med fokus på observasjon, komposisjon og kreative teknikkar. Kurset passar for både barn og vaksne.
Omvising i Jakob Sande og Nikka Vonens fotspor
Bli betre kjend med diktar og forteljar Jakob Sande og skulestyrar og folkeminnesamlar Nikka Vonen.
Film frå Fjaler. Filmframsyning i skulehuset
Bli med på ei reise tilbake i tid når sommarvertane inviterer til filmframsyning i skulehuset. "Film frå Fjaler" inneheld unike smalfilmar frå 1930- og 1950-talet, med glimt frå kvardagsliv, festdagar og samfunnsliv i bygda. Opptaka, gjort av distriktslækjarane Harald J. Blaauw og Asbjørn Østby, er i dag ein verdifull del av kulturarven i Fjaler.