Vekas dikt: KLEPPE-MARET

KLEPPE-MARET

Ho kleppe-Maret

frå Kleppeskaret

hev gard med hus på, og ku og sau,

og hest på stallen

og geit på tallen,

og litt på bankboki hev ho au.

Og Kleppe-Maret

frå Kleppeskaret

ho hev ein friar på kvar ein fing,

for åta lokkar

so store flokkar

på friarføter til Kleppe spring.

Der spring no Mass’en

frå Myraplassen,

som handlar hestar og berekyr,

og Rasmus bakar

og Per skomakar,

som skaftestøvlar og springskor syr.

Og når det lider

til nattetider,

då freistar alle si lukka der,

– dei smett og smyger

og lure lyger,

men alle saman kjem like nær.

For Kleppe-Maret

frå Kleppeskaret

ho elskar presten i Fresvik gjeld. –

Ho kann kje få han,

og tenkjer på han

med sorg og saknad kvar enda kveld.

Frå samlinga Svarte næter, 1929.