Stor pågang til residensordninga – 89 søkarar vil skape i Jakob Sande sin barndomsheim

Jakob Sande-senter for forteljekunst jobbar for å komme fram til nye stemmer inspirert av ein diktar som såg og lytta til menneske i alle samfunnslag, mellom anna gjennom ei residensordning, som 89 ulike menneske har søkt seg til med 67 ulike prosjekt det kommande året. Blant søkarane er det både røynde forfattarar, studentar, omsetjarar, scenekunstnarar og ei auke i internasjonale søkarar. Behovet for ein stad der forfattarar, andre skapande og studentar kan utvikle sine prosjekt og fellesprosjekt med oss er stort. Vi ser fram til å vidareutvikle Jakob Sande-senter for forteljekunst som ein levande møteplass for forteljekunst, kunnskapsdeling og kunstnarisk utvikling.

I år oppmoda vi særleg studentar som forska på tema knytt til skriftleg og munnleg forteljekunst, Jakob Sande eller immateriell kulturarv, om å søke. Det er gledeleg å sjå at fleire har gripe denne moglegheita.

Det er sett ned ei eiga nemnd som arbeider med tildeling av residensopphald. No ventar fleire rundar med gjennomgang av søknadane i nemnda, før det blir fatta vedtak om kven som får opphald neste år. Søkarane kan vente seg svar i løpet av månaden.

Eit glimt av kjøkkenet i barndomsheimen til diktaren Jakob Sande.