Vekas dikt: Husdråpa
Sande-diktet denne veka er "Husdråpa", og det er henta frå samlinga Storm frå vest. Husdråpa (norrønt Húsdrápa) er ei dråpe, eit skaldekvad frå om lag 985, som er teke vare på i Den yngre Edda. Med diktet tek Sande eit etterlengta farvel til ein hybel i hovudstaden.
Foto: Nanna Broch. Eigar: Oslo Museum
Husdråpa
(Farvel til ein Oslohybel).
Farvel du gamle rottehol der aldri eg såg sol,
farvel med dine loppor og din gamle pinnestol.
Farvel du skeive klaffebord, farvel du morkne seng,
å sova på ditt jammersbol eg aldri meire treng.
Og difor kann eg syngja av mi innarste sjel:
Farvel, farvel!
Farvel du gamle kakkelomn som oste så eg trur
at veggelusa hosta der ho svolta låg på lur.
Farvel du blanke kaffeskvip og mygla margarin,
no dreg eg heim til Gosen og drikk øl og brennevin.
Og difor kann eg helsa deg du transure kjel:
Farvel, farvel!
Farvel du gamle kjerring som meg gift i maten gav,
eg kann kje tru at eg skal fella tåror på di grav.
Du lurde på ditt offer som ei gamal krokodil
og hadde gjerne flått meg, dersom berre du slapp til.
Men no kann sjølve Tykjen ta di råbarka sjel:
Farvel, farvel!
Jakob Sande, storm frå vest (1931).
Ordforklaringar:
Husdråpa av: dråpe (f) = norrønt skaldekvad med eit slag omkvede
Tykjen = djevelen
Aktuelt fra Jakob Sande-senteret
Sandesenteret lanserer Forteljeduken
Forteljeduken er ein ny, vevd duk med motiv av illustratør Eva Meier, produsert ved det tradisjonsrike Ekelund veveri. Inspirert av liv, arbeid og forteljingar langs Dalsfjorden inviterer duken til samtale og glede rundt bordet.
Sandesenteret får støtte til å utbetre uteområdet ved Løa
Sandesenteret får støtte frå Huset i Bygda og kulturminnemidlar frå Fjaler kommune til å utbetre uteområdet ved Løa. Midlane gjer det mogleg å betre tilkomsten, gjere området universelt utforma og endå meir tilgjengeleg for alle, både dei som leiger huset, deltek på arrangement og brukar uteområdet til skule eller fritid.
I residens
Jógvan Helge Gardar er årets første i residensen. Under opphaldet skriv han på ein eigen roman i tillegg til å omsetje færøysk poesi til nynorsk.