Til Fjaler frå Kjersti Wøien Håland

det som rimar

Har du tenkt på at

nerveceller er mistenkeleg like trær

dei har greiner og røter

dei fortel hormonelle historier til kvarandre

som trea og menneska gjer

røter som grev djupt i fortida

greiner som strekk seg inn i framtida

sjølv når ikkje veit kva du skal si

har du ein skog som snakkar på innsida

Har du tenkt på at

ein fjord liknar ei blodåre

blågrøn snirklande og livsviktig

alltid i rørsle

fjorden går inn i bygdene

koplar dei til verda  

blodet strøymer inn til pumpene

og sidan jorda er rund

finnes ingen sentrum og ingen periferi

ingen er uviktige

har du tenkt på at

fjell liknar urgamle ansikt

berget foldar seg som hud

forma av alt som fell frå

når dei sovande kjempande

som alltid er stoisk og stille

plutseleg slipper taket

er det tida sine tårar som rasar

ingen er satt i stein

alt som finnes kan falle

har du tenkt på at

eit svart hol ser ut som ein pupill

så ikkje berre kan blikk drepe

men dei kan suge lyset ut av rommet

trekke deg til seg

så du fell inn i nokon andre si verd

eit parallelt univers

der du er sett

har du tenkt på at dei blikka som drep

er dei som ser vekk

har du tenkt på at

når du hevar stemmen

vibrerer stemmebanda dine

i følge superstrengteorien

består alt i universet av

vibrerande strenger

om du kokar alt ned

er vi strenginstrument

symfonien som aldri stoppar

spelt med usynlege hender

du er alltid ein del av eit samspel

du tenker som ein skog

græt som ein bergvegg

blør som ein fjord

sender sjelar på pilgrimsferd i dine auge

du spelar i eit uendeleg orkester

det er ein bra vits at du føler deg liten

eller at din stemme er uviktig

ikkje minst er det absurd å påstå

at du er ein slags evig solist

du er universet som spelar med seg sjølv

Kjersti Wøien Håland 

Kjersti Wøien Håland er forfattar og manusforfattar, skribent og lyrikar. Ho har markert seg som ei røyst for dei unge vaksne og har auka merksemda rundt distriktsungdom og nynorskbrukarar. 

Kjersti Wøien Håland er fødd i Høyanger, har gått på Firda vidaregåande skule, tekstforfattarutdanning frå Westerdald Høyskole i Oslo, manusforfattarlinja ved Den norske filmskolen i Lillehammer. Håland har vore teatersjef ved studentteateret Teater Neuf i Oslo, har gitt ut fleire lyrikksamlingar og romanar og vore manusforfattar for mellom anna TV-serien Lovleg.

Håland sin forfattarskap synleggjer ein ung generasjon som leitar etter meining. Tekstane hennar er engasjerte, gripande og avslørande, tidvis sjølvutleverande. Alvor går hand i hand med humor, og både framandgjering og identitet er ofte tema. Forfattaren skriv på nynorsk og nyttar eit kortfatta, leikande og tydeleg språk.

I 2025 var ho festdiktar under Fest i Fjaler 8.-10. august. Laurdag 9. august framførte ho tingingsverket "det som rimar" frå festscena på Samvirket.