Ny utgjeving frå Sandesenteret
Den vesle boka "Samspel" samlar dikt av Kjersti Wøien Håland og papirkunst av Eva Meier. Boka er inspirert av fjorårets tema Samspel og er no til sals i Gamle skulehuset.
Kjersti Wøien Håland var festdiktar på Fest i Fjaler i fjor. Med utgangspunkt i opplevingane frå dagane i Fjaler og festivaltemaet Samspel, skreiv ho ei rekkje dikt.
Kjersti Wøien Håland er forfattar og manusforfattar, skribent og lyrikar. Ho har markert seg som ei røyst for dei unge vaksne og har auka merksemda rundt distriktsungdom og nynorskbrukarar.
I etterkant av Fest i Fjaler fekk kunstnar og illustratør ved Sandesenteret, Eva Meier, lese dikta. Ho såg at ei kunstform som ville passe godt til orda, var papirkunst, og arbeidde med ein teknikk der ho klipte ut ei mengd papirdelar og sette dei saman til forteljande bilete. Resultatet er eit særprega visuelt uttrykk som spelar tett saman med tekstane.
No er orda til Kjersti og papirkunsten til Eva samla i boka Samspel. Ei lita, men rik utgjeving der tekst og bilete møtest i eit felles uttrykk.
Jakob Sande-senter for forteljekunst er utgjevar av boka, som er trykt hos E. Natvik Prenteverk AS i Florø.
Boka er til sals i Gamle skulehuset.
Aktuelt fra Jakob Sande-senteret
Til lukke med arbeidarane sin internasjonale kampdag
1. mai er arbeidarane sin kampdag, der krav om rettferd og betre arbeidsvilkår blir løfta fram. I diktet "Til den norske landarbeider" oppmodar Jakob Sande arbeidaren til å reise seg, knyte nevane og slutte seg til kampen, og gå saman under ei felles fane.
Les elevane sin rapport frå Bygningsverndagen 2026
Alle sjuandeklassingar i Fjaler og Hyllestad var invitert til Steia gard til Bygningsverndag 21. april. Der deltok elevane i tradisjonshandverk som sløyd, smie, steinarbeid, lafting og gartnararbeid i det rike kulturhistoriske miljøet. Jakob Sande - senter for forteljekunst, Nikka Vonen venelag, Skogselskapet og Kvernsteinsparken stod bak arrangementet. Skrivegruppa fekk prøve seg som både diktarar og journalistar. Med forteljingane om jentene som gjekk på Nikka Vonens pigeskole ferskt i minne, dikta dei fram brev og dagboknotatar frå ein morgon på Steia gard. Dei skreiv også frå ting som var tause forteljarar og fann på historier. Deretter prøvde dei seg som journalistar, og måtte sjå, høyre og spørje for å finne fram til fakta. Her kan du lese journalistane sin rapport frå dagen:
Vekas dikt: KLEPPE-MARET
Årets tema i Sandesenteret er "kvinna". Som del av arbeidet med temaet set vi mellom anna søkelys på kvinnene i Sande si dikting. Kvar veke deler vi eit dikt som passar til temaet. Denne vekas dikt er Kleppe-Maret.