Ny utgjeving frå Sandesenteret
Den vesle boka "Samspel" samlar dikt av Kjersti Wøien Håland og papirkunst av Eva Meier. Boka er inspirert av fjorårets tema Samspel og er no til sals i Gamle skulehuset.
Kjersti Wøien Håland var festdiktar på Fest i Fjaler i fjor. Med utgangspunkt i opplevingane frå dagane i Fjaler og festivaltemaet Samspel, skreiv ho ei rekkje dikt.
Kjersti Wøien Håland er forfattar og manusforfattar, skribent og lyrikar. Ho har markert seg som ei røyst for dei unge vaksne og har auka merksemda rundt distriktsungdom og nynorskbrukarar.
I etterkant av Fest i Fjaler fekk kunstnar og illustratør ved Sandesenteret, Eva Meier, lese dikta. Ho såg at ei kunstform som ville passe godt til orda, var papirkunst, og arbeidde med ein teknikk der ho klipte ut ei mengd papirdelar og sette dei saman til forteljande bilete. Resultatet er eit særprega visuelt uttrykk som spelar tett saman med tekstane.
No er orda til Kjersti og papirkunsten til Eva samla i boka Samspel. Ei lita, men rik utgjeving der tekst og bilete møtest i eit felles uttrykk.
Jakob Sande-senter for forteljekunst er utgjevar av boka, som er trykt hos E. Natvik Prenteverk AS i Florø.
Boka er til sals i Gamle skulehuset.
Aktuelt fra Jakob Sande-senteret
Forteljekunst i skule, arbeid og liv
I mars samla vi folk og miljø med forteljing som kjerne i si verksemd til Sandeseminaret. Høgt på agendaen stod eit eige programfag i skapande skriving og forteljekunst i vidaregåande skule.
God påske frå Jakob Sande-senter for forteljekunst
Med diktet “Salme” ønskjer vi ei god påske. Diktet vart fyrst publisert i diktsamlinga Storm frå vest i 1931. Salmen er ei bøn til Jesus, med referanse til skjærtorsdagsnatta i Getsemane og korsfestinga langfredag.