Mange små og store på Diktardagen
Både born, ungdom og vaksne kom for å feire Diktardagen og oppleve førjula hos Jakob Sande - senter for forteljekunst.
I Klokkargarden er førjulstida ekstra spesiell. Den startar med Jakob Sande sin fødedag 1. desember, og er månaden då eit av dei mest kjende og kjære dikta, Det lyser i stille grender, vert sunge landet rundt.
Det markerer vi med Diktardagen, og i år deltok kring 80 personar i alle aldrar på ein stemningsfull kveld i tunet.
Dagen starta med at elevar frå valfaget Produksjon for scene kom på skrivekurs med Thea Hjelmeland. Jakob Sande - senter for forteljekunst samarbeider tett med Kulturskulen i HAF om faget.
I Løa skapte arenaansvarleg Margrete Reisæter julemagi, med langbord dekt til femti born og foreldre og julegraut til alle som kom.
Kokosbananas-skapar Rolf Magne Golten Andersen las og synte bilete frå Nattninja - den siste togreisen, til eit svært engasjert publikum. Ikkje minst fekk vi førpremiere på Kokosbananas-julesangen, med glade og dansande ungar som inntok scena.
Så samla vi oss ved det flotte tuntreet vårt for å tenne lysa i Klokkargarden. Tusen takk til Søren Hauge for raust utlån av lift og til Magne Hillersøy for solid innsats med å lyssetje bøketreet.
Der ynskte dagleg leiar Rakel C. W. Solheim velkomen og Madina Darwazi las diktet Utan forord.
Ungdommane framførde tekstar dei hadde laga på skrivekurset, og Thea Hjelmeland leia oss i allsong og juletregong, til trekkspel ved Jan Haugen.
Til slutt var det ope i alle hus, og publikum kunne lytte til Gunnstein Akselbergs “Helsing til Jakob Sande på 119-års dagen” i Gamle skulehuset, kike innom Bestefarsstaua, og helse på det nystifta venelaget for Nikka Vonen på Steia gard.
Dikt av Madina Darwazi:
Utan forord
fører eg pennen
over arket,
prøver å leggja orda
som perler på ei snor
i stille rekkjer…
Men i djupet av mitt sinn
rasar eit opprør –
eit villt angrep av ord,
som ein flaum utan stans
mot brystet
Som om orda
er meir urolege
enn hjartet mitt.
Takk til alle som deltok!
Aktuelt fra Jakob Sande-senteret
Til lukke med arbeidarane sin internasjonale kampdag
1. mai er arbeidarane sin kampdag, der krav om rettferd og betre arbeidsvilkår blir løfta fram. I diktet "Til den norske landarbeider" oppmodar Jakob Sande arbeidaren til å reise seg, knyte nevane og slutte seg til kampen, og gå saman under ei felles fane.
Les elevane sin rapport frå Bygningsverndagen 2026
Alle sjuandeklassingar i Fjaler og Hyllestad var invitert til Steia gard til Bygningsverndag 21. april. Der deltok elevane i tradisjonshandverk som sløyd, smie, steinarbeid, lafting og gartnararbeid i det rike kulturhistoriske miljøet. Jakob Sande - senter for forteljekunst, Nikka Vonen venelag, Skogselskapet og Kvernsteinsparken stod bak arrangementet. Skrivegruppa fekk prøve seg som både diktarar og journalistar. Med forteljingane om jentene som gjekk på Nikka Vonens pigeskole ferskt i minne, dikta dei fram brev og dagboknotatar frå ein morgon på Steia gard. Dei skreiv også frå ting som var tause forteljarar og fann på historier. Deretter prøvde dei seg som journalistar, og måtte sjå, høyre og spørje for å finne fram til fakta. Her kan du lese journalistane sin rapport frå dagen:
Vekas dikt: KLEPPE-MARET
Årets tema i Sandesenteret er "kvinna". Som del av arbeidet med temaet set vi mellom anna søkelys på kvinnene i Sande si dikting. Kvar veke deler vi eit dikt som passar til temaet. Denne vekas dikt er Kleppe-Maret.