Jakob Sande-bautaen 60 år

Bysta er laga av bilethoggaren Waldemar Dahl. Jakob Sande var sjølv med på avdukinga og det heile vart foreviga av NRK. 

Det var Fest i Fjaler helga 19. og 20. november 1966 då Jakob Sande vart heidra av heimbygda. Dale musikklag opna med Norge, mitt Norge og Ut mot havet før Oddleif Fagerheim heldt avdukingstalen. Talen var ein hyllest til diktaren Jakob Sande, og han slutta med desse orda: "Kjære Jakob Sande, ta desse få og enkle ord frå ein representant frå dine eigne heimegrender som ei fattig takk for ditt livsens verk. Vi har sett deg her midt mellom oss - midt i flokken av den slekt som i all tid skal leve og stride, bu og byggje her." Fagerheim avduka så æresminnet og overleverte det frå nemnda til Fjaler kommune. I boka Ein storm frå vest skriv Herbjørn Sørebø om bysta og meiner det var Oddleif Fagerheim og dåverande ordførar Ola Sørebø og Alf Solheim som kom på tanken om å få den reist og utgjorde nemnda. Ordførar Sørebø tok imot og takka. - Merket vil stå her som eit uttrykk for alt vi har fått av Jakob Sande, og minne ungdomen om at Fjaler har fostra ein landskjend mann, sa Sørebø.

I år markerer vi at det er 60 år sidan avdukinga. 17. mai-toget i Dale legg løypa om staden bysta står og markerer jubileet ved at Dale musikkorps spelar "i marsjtakt", som er ein potpurri av tekstar av Jakob Sande, komponert av Jørgen Alisøy. 

Jubileet vil også bli markert seinare i år, under Fest i Fjaler 14.-16.august og på 120-årsdagen for fødedagen til Jakob Sande 1.desember. 

Bautasteinar er eitt av dei siste dikta til Jakob Sande og er henta frå samlinga Det kveldar på Kobbeskjer. Det signaliserer kan hende at eit æresminne i stein ikkje var så viktig for Jakob Sande, at det var orda hans som skulle stå att etter han. Likevel var det nok ei ære for han at Fjaler kommune heidra han med ei byste i heimbygda Dale. 

Bautasteinar

Det kan no so ymse vera

med eitt og hitt.

Kvar har vel sitt å bera,

eg har mitt.

No vil vel dei fleste seie

at eg bar mest.

Sjølv vil eg heller teie,

det høver best.

Men kviskra i løynd går orda

frå mann til mann:

Han her grov sitt pund i jorda

-ferdig med han.

So Herren vår Gud bevare

alle som ein!

Her kan vi trygt bespare

ein bautastein.-

Nei, ta det med ro, småsveinar,

trø stilt på jord.

Eg har reist mine bautasteinar

i ord.

Jakob Sande