Fjaler inspirerer andre til å løfte kultur som ei viktig næringsgrein

– Det dei har greidd i Fjaler, er å utforma ideane i slagkraftige visjonar. Handlekraftige personar har teke initiativ og sett i gang prosessar, seier Johan Myking, styreleiar for senioruniversitetet i Nordhordland, til Avisa Nordhordland. 

Artikkelforfattar Oddbjørn Rosnes skriv vidare om fleire satsingar på kulturutvikling i Fjaler. Mellom anna den årlege teaterfestivalen, ein sterk interkommunal kulturskule, kulturverksemda PreForm og Nordisk Kunstnarsenter. 

– Nøkkelen til det me utviklar, er samarbeid, seier Rakel Cecilie Wilhelmsen, dagleg leiar på Jakob Sande - senter for forteljekunst, til avisa. 

– Når me løftar i lag, lokalt, regionalt og nasjonalt, skapar me kraft til å byggje noko som varer og har tyngd. For oss har det vore viktig å ta vare på røtene og frivilligheita, samtundes som vi hevar blikket og lyttar til nye stemmer.

Rakel Cecilie Wilhelmsen peikar også på at Fjaler kommune har ei medvita satsing på kultur som del av samfunnsutviklinga. – Ei satsing på kultur er ei satsing på samfunnsutvikling, fellesskap og bulyst, som sikrar ei sterkare tilhøyrsle og identitet, seier ho til avisa. 

I artikkelen er også Ivar Hopland, leiar i Alver kulturråd, intervjua. Han kjenner godt til den satsinga som skjer i Fjaler. – Ein kan ikkje anna enn verta imponert av det ein ganske liten kommune som Fjaler får til. Me er vel ti gonger så mange innbyggjarar berre i Alver, og endå meir om ein ser heile distriktet samla. Det er klart me måtte kunna greia noko tilsvarande, seier Hopland til Avisa Nordhordland.