Engasjerte førskuleungar på besøk i tunet
Dagen etter vi markerte Nynorskdagen, kom førskuleungane frå Våge - og Flekke barnehage til Sande-tunet for å motta sine bokpakkar. Under Sandeseminaret 3.-4. april lanserte vi “Fjaler les”, der alle førskuleungar i Fjaler får ein bokpakke med nynorsk kvalitetslitteratur med oppmoding om lesande heimar. Gjennom forteljing, høgtlesing, teikning og ei lita omvising fekk førskuleungane bli litt betre kjend med Sandesenteret, og vi litt betre kjende med dei.
Polina, som er i språkpraksis i Sandesenteret, las høgt for førskuleungane i Gamle skulehuset.
Lita hand med sin første bokpakke.
Initiativet med bokpakkane følger mellom anna opp leselyststrategien Tid for lesing frå regjeringa, der det vert sett søkelys på dei dalande leseferdigheitene til barn og unge. “Fjaler les!” er ein pilot, som vi håpar å få til som eit fast tilbod.
Prosjektet er eit samarbeid mellom Sandesenteret, Fjaler kommune, Samlaget og Fylkesbiblioteket.
Arenaansvarleg, Margrete, viste rundt i Bestefarstaua og i tunet. Her viser ho bilete av Jakob då han var på same alder som dei.
Jakob og Neikop og alle dei andre las Rakel og Polina, og etterpå fekk ungane teikne seg sjølv i eigne eksemplar av boka.
På gjensyn!
Aktuelt fra Jakob Sande-senteret
Til lukke med arbeidarane sin internasjonale kampdag
1. mai er arbeidarane sin kampdag, der krav om rettferd og betre arbeidsvilkår blir løfta fram. I diktet "Til den norske landarbeider" oppmodar Jakob Sande arbeidaren til å reise seg, knyte nevane og slutte seg til kampen, og gå saman under ei felles fane.
Les elevane sin rapport frå Bygningsverndagen 2026
Alle sjuandeklassingar i Fjaler og Hyllestad var invitert til Steia gard til Bygningsverndag 21. april. Der deltok elevane i tradisjonshandverk som sløyd, smie, steinarbeid, lafting og gartnararbeid i det rike kulturhistoriske miljøet. Jakob Sande - senter for forteljekunst, Nikka Vonen venelag, Skogselskapet og Kvernsteinsparken stod bak arrangementet. Skrivegruppa fekk prøve seg som både diktarar og journalistar. Med forteljingane om jentene som gjekk på Nikka Vonens pigeskole ferskt i minne, dikta dei fram brev og dagboknotatar frå ein morgon på Steia gard. Dei skreiv også frå ting som var tause forteljarar og fann på historier. Deretter prøvde dei seg som journalistar, og måtte sjå, høyre og spørje for å finne fram til fakta. Her kan du lese journalistane sin rapport frå dagen:
Vekas dikt: KLEPPE-MARET
Årets tema i Sandesenteret er "kvinna". Som del av arbeidet med temaet set vi mellom anna søkelys på kvinnene i Sande si dikting. Kvar veke deler vi eit dikt som passar til temaet. Denne vekas dikt er Kleppe-Maret.