Litteratursalong med Kjartan Hatløy i samtale med Sivert N. Nesbø

Møt Kjartan Hatløy i samtale med Sivert N. Nesbø om hans siste utgjeving "Mot kaos". Kjartan Hatløy har lenge hatt ei brennande interesse for egyptologien. I "Mot kaos" omset han denne lidenskapen i dikt. Boka opnar på diktarens heimstad ved Åfjorden og Lifjellet og trekkjer forbindelsen til Det gamle Egypt - til Nilen og pyramidane i Giza og Luxor. Storleikar frå oldtidas førestillingsverd kjem til syne langs vegen, i skog og vatn, og Hatløy går i dialog med den gammalegyptiske måten å tenkje om livssyklusen på: Han gjer døden til reisekamerat. 

Cellist Eline Sundal speler til Hatløy sine lesingar. 

Kjartan Hatløy debuterte i 1996 med diktsamlinga Solreven. Sidan har han gitt ut ei lang rekke kritikarroste samlingar. Kjøkkendikt frå 2012 blei innstilt til Brageprisen, mens Den kvite vegen (2016) blei innstilt til Ungdommens kritikerpris og er omsett til tysk. I 2017 kom Dikt i samling ut, som inneheld alle Hatløys bøker t.o.m. Den kvite vegen. Same år utgav den tyske filmskaparen Frank Wierke ein dokumentarfilm om forfattaren, Der Sonnenfuchs. Diktsamlinga Mot kaos. 100 dikt om Egypt (2025) er Kjartan Hatløys 15. samling.

Hatløy er rekna som ein av våre største naturlyrikarar. I 2015 blei han heidra med lyrikkprisen Diktartavla for sin markante forfattarskap. Den legendariske diktarstien i tunet på Hardanger folkemuseum blei med dette utvida med steintavle nr. 24. Diktartavla skal fremja positiv merksemd om norsk lyrikk og er eit samarbeid mellom Hauge-senteret og Hardanger folkemuseum.

I 2021 vart Kjartan Hatløy tildelt Doblougprisen for heile sitt forfattarskap.

I Fjaler samtalar Kjartan med Sivert N. Nesbø. 

Sivert Nikolai Nesbø er forfattar og akademileiar ved Skrivekunstakademiet. Han debuterte i 2013 med romanen Skårgangar og har seinare gitt ut fleire kritikarroste romanar. I 2019 ga han ut barneboka Hauk, illustrert av Susanna Kajermo. Den siste romanen hans, Varme og vatn, kom i 2021. Same år kom også "Framom døden", ei omsetjing av William Faulkners "As I Lay Dying". For denne vart han nominert til Bastianprisen. Sivert har delteke på fleire av Sandesenteret sine Sandeseminar i oppbygginga av fagmiljøet ved senteret, vore styremedlem i Jakob Sande - selskapet og sit no i redaksjonsrådet til Jakob Sande - senter for forteljekunst sitt tidsskrift, Tidsskriftet Jaja. 

Cellisten Eline Sundal speler til Kjartan sine lesingar. Eline Sundal byrja spele cello i ung alder og vart teken opp som hospitant ved Bergen Musikkonservatorium i perioden 1992–1995. Deretter heldt ho fram som fulltidsstudent ved Griegakademiet, og fullførte to års grunnutdanning frå 1995 til 1997 med cellisten Sally Guenter og solocellisten Sebastian Dørfler (Bergen Filharmoniske Orkester). I 1997 vart Eline teken opp som bachelorstudent ved Guildhall School of Music and Drama, der ho sidan starta master- og diplomstudium i avansert orkesterspel med professor Leonard Sthen. Eline har arbeidd som distriktsmusikar i Nesna kommune, men bur no i Fjaler, der ho arbeider som lærar. Eline blir jamleg engasjert i ulike samarbeid og opptrer og med eigne oppsetjingar. Eline arbeider innanfor ulike musikalske sjangrar. Repertoaret hennar strekk seg frå renessansemusikk til samtidsmusikk og jazz.

Eg går denne blågrå vegen min der den svingar opp til huset, nyt svingen


gjennom og med så vakre dagar


endåtil dei med hagl og snø og regn er vakre


eg er aldri åleine


nei, for Hathor er med meg - gudinna for kjærleik og død


ho kjem ut av statua si og røskar meg med


eller ho tek meg i handa og leiar meg om bord i sitt smil


ho breiar fram ein hemmeleg sti


den er av sommarkvite heta steinar, dei ber oss ti tusen år


denne næraste sola, proxima sin nabo, er far vår


han er den mildaste mellom gudar og menneske


det er han alltid, så han ropar oss ikkje inn


nei enno ikkje

Kjartan Hatløy i "Mot kaos"