Forfattarmøte i skulehuset
Nyt ein kaffi i det gamle skulehuset medan forfattar Elida Karo les nyskrivne tekstar frå tida si i residens.
Nyt ein kaffi i det gamle skulehuset medan forfattar Elida Karo les nyskrivne tekstar frå tida si i residens. Her har ho arbeidd med sitt andre romanprosjekt, ein roman om generasjonstraume, krig og oppvekst. Det høyrest ganske dystert ut, ho innrømmer det, men også i mørkret finst det lys, og forfattaren lovar å finne fram til nokre lysglimt for oss, på ein vårdag som denne.
Elida Karo (1999) er forfattar og utdanna journalist frå Oslo. Ho har erfaring frå media som Aftenposten, Klassekampen og NRK, og er no frilansjournalist. Ho har og gått Forfatterstudiet i Bø.
Hausten 2025 debuterte ho skjønnlitterært med romanen "Og forresten heter jeg Leah" på Aschehoug forlag. Det er ein roman om relasjonar som går i arv, one night stands og oppvekst. Og om kjærleik og seksualitet i eit klasseperspektiv.
Programmet er ein del av Vårdag i Dale der det vert opne hus i alle husa på Tusenårsstaden frå kl. 11-14. Kringebua held open kafè, så du kan kjøpe med deg ein bolle og kaffi.
Gratis inngong.
Velkomen!
Kva skjer hos oss?
Teiknekurs med Charlotte Rintler
Utandørs teiknekurs med kunstnar og illustratør Charlotte Rintler ved historiske Nikka Vonens pikeskole på Steia Gard. Gjennom teikning med blyant og blekk utforskar kurset dei gamle trehusa, detaljane og stemningane på staden, med fokus på observasjon, komposisjon og kreative teknikkar. Kurset passar for både barn og vaksne.
Omvising i Jakob Sande og Nikka Vonens fotspor
Bli betre kjend med diktar og forteljar Jakob Sande og skulestyrar og folkeminnesamlar Nikka Vonen.
Film frå Fjaler. Filmframsyning i skulehuset
Bli med på ei reise tilbake i tid når sommarvertane inviterer til filmframsyning i skulehuset. "Film frå Fjaler" inneheld unike smalfilmar frå 1930- og 1950-talet, med glimt frå kvardagsliv, festdagar og samfunnsliv i bygda. Opptaka, gjort av distriktslækjarane Harald J. Blaauw og Asbjørn Østby, er i dag ein verdifull del av kulturarven i Fjaler.