Jakob Sande - senter for forteljekunst 5 år
Sandesenteret feirar fem år som Noregs første forteljekunstsenter under Fest i Fjaler 08.-10. august. Sidan opninga i 2020 har senteret etablert seg som ein sentral aktør innan forteljekunst og nynorsk kulturformidling. Under Fest i Fjaler markerer vi jubileet med eit variert program som spenner frå prisutdeling og tidsskriftlansering til samtalar, urframføringar, musikk, dans og forteljingar. Bli med på feiringa!
Frå opningshelga av Jakob Sande - senter for forteljekunst i 2020. Foto av David Zadig.
Sidan opninga i 2020 har Sandesenteret bygd opp ei vesentleg verksemd og fått stor merksemd og blitt eit vitalt senter for forteljekunst. Etableringa er resultat av Jakob Sande-selskapet sitt mangeårige arbeid, eit forprosjekt frå 2019 og uttalte ambisjonar frå lokale, regionale og nasjonale politikarar. Ein liten og profesjonell administrasjon har bygd opp senteret med støtte frå Kulturdepartementet, Vestland fylke, Fjaler kommune og private stiftingar.
Dei første etableringsåra har vi gjennom akademi, residensordning, produksjonar og utstillingar, arrangement, kurs, seminar fått auka merksemda og kunnskapen om Sande, nynorsk språk og forteljekunsten. Vi har etablert faglege nettverk og byggjer eit fagmiljø innom munnleg og skriftleg forteljekunst, samt gir rom og støtte til utvikling av eit mangfald av stemmer og forteljingar.
Sandesenteret har hatt stor verksemd og nådd mange tusen menneske med sine tilbod og gjort nasjonal og internasjonal interesse og behov for eit slikt senter synleg. Vi har gradvis utvida areala og verksemda ved å ta i bruk og rehabilitere eksisterande bygningsmasse og kulturmiljøet. Vi er takksame for å få drive fram eit arbeid som kjennest meiningsfullt og viktig, og gler oss til å vidareutvikle senteret og skape varige røter i eit kulturmiljø som stadig har plass for skaping, utvikling og fellesskap.
På programmet står det utdeling av samlagsprisen, lansering av Sandesenteret sitt tidsskrift, Tidsskriftet Jaja, si fysiske utgåve, samtalar, føredrag, musikk og dans, barneprogram. urframføringar og forteljing.
Bli med på feiringa!
Aktuelt fra Jakob Sande-senteret
Den folkekjære forteljekunstnaren Jon Eikemo har gått bort
Den folkekjære forteljekunstnaren og skodespelaren Jon Eikemo har gått bort. Vi vil særleg hugse han for hans store engasjement for Jakob Sande si dikting, som han bar fram med kraft, klokskap og varme.
Møt Jakob Sandesenteret på Kvernsteinsmarknaden
Laurdag 7. juni besøker Jakob Sande - senter for forteljekunst Hyllestad og den årlege kvernsteinsmarknaden der. På standen finn du informasjon om Jakob Sandesenteret, eigne produkt som koppar, t-skjorter, bøker og dukar, samt aktuell nynorsk litteratur.
No blir det ungdomsakademi i forteljekunst i Sandesenteret
I juni tek Jakob Sande – senter for forteljekunst imot 22 elevar frå helse- og oppvekstfag ved Dale vidaregåande skule til to dagar med kurs og verkstader i skapande skriving og formidling, danning og fellesskap. Akademiet er ein pilot for eit programfag i skapande skriving og forteljekunst i den vidaregåande skulen.